Армения Фондунун 20 жылдыгына арналган панелдик сессия 2025-жылдын 18-июлунда Дилижан шаарында болуп өттү

«Каржылык туруктуулукта аманаттарды камсыздандыруу (кепилдик берүү) тутумунун ролу» темасындагы панелдик сессия 2025-жылдын 18-июлунда Дилижан шаарында (Армения Республикасы) болуп өттү. Иш-чара Армения Республикасынын Аманаттардын ордун толтурууга кепилдик берүү фонду тарабынан уюштурулуп, Арменияда аманаттарга кепилдик берүү тутумунун түзүлгөндүгүнүн 20 жылдык мааракесине арналды. Иш-чарага он өлкөнүн өкүлдөрү катышты.

• Сессияны Армения Республикасынын Аманаттардын ордун толтурууга кепилдик берүү фондунун директору Эрмине Арутюнян жана Армения Республикасынын Борбордук банкынын төрагасы Мартин Галстян ачып, катышуучуларды куттукташты.
• Россия Федерациясынын «Аманаттарды камсыздандыруу агенттиги» мамлекеттик корпорациясынын башкы директору Андрей Мельников Россиядагы каржылык туруктуулукту колдоодо аманаттарды камсыздандыруу тутумунун ролу жөнүндө баяндама жасап, узак мөөнөттүү аманаттар боюнча камсыздандыруу төлөмүнүн чектелген өлчөмүн жогорулатууга байланыштуу мыйзамдагы жаңылыктар тууралуу айтып берди.
• Беларусь Республикасынын Жеке жактардын банктык аманаттарынын (депозиттеринин) ордун толтурууга кепилдик берүү боюнча агенттигинин башкы директорунун орун басары Юрий Липницкий мамлекеттин каржылык туруктуулугун колдоо тутумунда Агенттиктин ролу жөнүндө айтып берди.
• Казакстандын Депозиттерге кепилдик берүү фондунун төрагасынын орун басары Бота Акбаева Казакстан Республикасынын каржылык туруктуулугун колдоодо аманаттарды камсыздандыруу тутумунун ролу, атап айтканда, аманаттарды камсыздандыруу тутумуна катышуучу банктардын мүчөлүк акылар чендерин белгилөө механизми депозиттер боюнча пайыздык чендердин деңгээлине реформалоонун тийгизген таасири жөнүндө айтып берди.
• Грузиянын Депозиттерди камсыздандыруу боюнча агенттигинин башчысы Леван Тодуа сессиянын катышуучуларына Депозиттерди камсыздандыруу боюнча агенттиктин иши жана Грузиянын аманаттар рыногу жөнүндө маалымат берди.
• Венгриянын Депозиттерди камсыздандыруу боюнча улуттук фондунун башкы директору Андраш Комар депозиттерди камсыздандыруучунун каржылык туруктуулукту колдоо тутумунун башка катышуучулары менен өз ара аракеттенүүсү жөнүндө баяндама жасады. Бул тема боюнча Депозиттерди камсыздандыруучулардын европалык форумунун (EFDI) документи сунушталды, анын авторлорунун бири – Комар мырза.
• Армения Республикасынын Борбордук банкынын Окуу-изилдөө борборунун өкүлдөрү кризис мезгилинде депозиттерге кепилдик берүү тутумунун ролун изилдөөнүн натыйжаларын сунушташты. Армениянын тажрыйбасы көрсөткөндөй, мурунку кризистер аманатчылардын аманаттык жүрүм-турумуна олуттуу таасир этет.
• Италиялык «DIAMAN Tech» финтех-компаниясынын башкы директору Майкл Занон аманаттарды камсыздандыруу тутумунун инвестициялык портфелинин стратегиялык туруктуулугун жогорулатуу үчүн интеграцияланган стресс-тесттерге жана симуляциялык моделдерге арналган презентация жасады. Ал депозиттерди камсыздандыруучунун инвестициялык портфелинин туруктуулугунун критикалык маанисин жана бухгалтердик отчеттуулуктун негизинде баалоо механизми менен операциялык лимиттерди контролдоону бириктирген ийкемдүү жана масштабдалуучу платформаны колдонуу зарылдыгын баса белгиледи.