Փորձագիտական խմբի նիստը կայացել է Դիլիջանում 2025 թվականի հուլիսի 17-ին
Եվրասիական տնտեսական հանձնաժողովի ֆինանսական շուկաների հարցերով խորհրդատվական կոմիտեին կից Եվրասիական տնտեսական միության տարածքում բանկային ավանդների (դեպոզիտների) ապահովագրման (երաշխավորման), վարկային կազմակերպությունների լուծարման, ֆինանսական առողջացման և սնանկացման ոլորտում օրենսդրության ներդաշնակեցման փորձագիտական խմբի գործունեության շրջանակներում 2025 թվականի հուլիսի 17-ին Դիլիջան քաղաքում (Հայաստանի Հանրապետություն) կայացել է հերթական նիստը, որի կազմակերպիչն էր Հայաստանի Ավանդների հատուցումը երաշխավորող հիմնադրամը։
Փորձագիտական խմբի նիստի շրջանակներում քննարկվել են հետևյալ հարցերը.
- «Ավանդների ապահովագրման համակարգում ռիսկերի կառավարումը և ավանդների ապահովագրման համակարգի սթրես-թեստավորումը» և «Ավանդներ ապահովագրողի գործունեության անընդհատության ապահովման համակարգը» փորձագիտական եզրակացությունը (նախնական քննարկում);
- «Գործընթացային կառավարումը և ներքին վերահսկողության համակարգը ավանդների (դեպոզիտների) ապահովագրման (երաշխավորման) կազմակերպությունում» փորձագիտական եզրակացությունը (նախնական քննարկում);
- Եվրասիական տնտեսական միության անդամ պետությունների օրենսդրության ներդաշնակեցման վերաբերյալ համաձայնեցված առաջարկներ՝ բնակչության ավանդների (դեպոզիտների) ապահովագրման (երաշխավորման) համակարգերի գործունեության առնչությամբ։
Միջոցառմանը մասնակցել են ԵԱՏՄ անդամ պետությունների և Ուզբեկստանի Հանրապետության ավանդների ապահովագրման (երաշխավորման) կազմակերպությունների և ֆինանսական ոլորտի կարգավորող մարմինների ներկայացուցիչները, ինչպես նաև Եվրասիական տնտեսական հանձնաժողովի ներկայացուցիչները։
